Hvað er læknisfræðileg eðlisfræði?

​Læknisfræðileg eðlisfræði er undirgrein hagnýttrar eðlisfræði sem snýr helst að notkun röntgengeislunar og gammageislunar í læknisfræðilegum tilgangi en einnig að myndgreiningartækni í víðari skilningi. Röntgengeislun  og gammageislun er nýtt bæði til greiningar og meðferðar, t.d. í röntgen- og tölvusneiðmyndatöku, jáeindaskönnun og geislameðferð. Röntgen- og gammageislun er einnig nefnd jónandi geislun.

​

Læknisfræðilegir eðlisfræðingar eru fagstétt í heilbrigðisþjónustu sem sérhæfir sig í réttri, nákvæmri og öruggri notkun jónandi geislunar. Læknisfræðilegir eðlisfræðingar hafa lokið framhaldsnámi á háskólastigi í faginu auk þess að hafa hlotið klíníska starfsþjálfun í sérgrein á borð við geislameðferð eða myndgreiningu.

​​

Hlutverk læknisfræðilegra eðlisfræðinga í heilbrigðisþjónustu eru meðal annarra:​

​

• Geislavarnir sjúklinga, starfsfólks og almennings

• Öryggismál og gæðaeftirlit

• Eftirlit með notkun á geislavirkum lyfjum​

• Klínískt eftirlit með meðferðum sjúklinga

• Virk þátttaka í meðferð sjúklinga

• Þróun og innleiðing nýrrar tækni 

• Fræðsla og faglegar upplýsingar til sjúklinga og starfsmanna

• Rannsóknir